Byrjunarliðið gegn Króötum | Alfreð sagður byrja í stað Eiðs Smára

Flautað verður til leiks í landsleik Íslands og Króatíu á Laugardalsvelli klukkan 19 í kvöld. Byrjunarlið Íslands verður ekki staðfest fyrr en klukkustund fyrir leik.

Birkir Már Sævarsson er í leikbanni og því þarf að fylla í hans skarð í stöðu hægri bakvarðar. Skiptar skoðanir eru á hvernig best sé að leysa þá stöðu. Hallgrímur Jónasson, miðvörður SönderjyskE, og Ólafur Ingi Skúlason, miðjumaður Zulte Waregem, hafa oftast verið nefndir til sögunnar.

Þá sagði Sverrir Þór Sverrisson, Sveppi, í viðtali á X-inu 977 í dag að Eiður Smári Guðjohnsen yrði ekki í byrjunarliðinu í kvöld. Sveppi og Eiður eru miklir félagar og sagðist Sveppi pirraður að Eiður yrði á bekknum og Alfreð Finnbogason byrjaði.

Alfreð er markahæsti leikmaðurinn í hollensku deildinni og hefur verið sjóðandi heitur fyrir framan markið undanfarin ár.

Líklegt byrjunarlið má sjá hér að neðan:

Markvörður: Hannes Þór Halldórsson

Hægri bakvörður: Hallgrímur Jónasson

Miðvörður: Ragnar Sigurðsson

Miðvörður: Kári Árnason

Vinstri bakvörður: Ari Freyr Skúlason

Hægri kantur: Jóhann Berg Guðmundsson

Miðja: Aron Einar Gunnarsson

Miðja: Gylfi Þór Sigurðsson

Vinstri kantur: Birkir Bjarnason

Framherji: Alfreð Finnbogason

Framherji: Kolbeinn Sigþórsson