Drogba og félagar fara til Brasilíu

Liði Fílabeinsstrandarinnar dugði 1-1 jafntefli gegn Senegal til að tryggja sér þátttökurétt á HM í Brasilíu næsta sumar.

Fílabeinsströndin var í góðri stöðu fyrir síðari viðureignn liðanna í lokaumferð forkeppninnar í Afríku með 3-1 sigri á heimavelli í fyrri leiknum.

Það mátti þó litlu muna í dag þar sem að Moussa Sow, leikmaður Fenerbahce, kom Senegal yfir, 1-0, með marki úr vítaspyrnu á 77. mínútu. Senegal þurfti þá aðeins eitt mark til viðbótar til að tryggja farseðilinn til Brasilíu.

En Salomon Kalou gerði endanlega út um vonir Senegal er hann tryggði Fílabeinsströndinni jafntefli með marki á fjórðu mínútu uppbótartímans. Kalou er fyrrum leikmaður Chelsea en spilar í dag með Lille í Frakklandi.

Niðurstaðan var því 4-2 samanlagður sigur Fílabeinsstrandarinnar sem mun keppa í úrslitakeppni HM í þriðja skiptið í röð.

Senegal hefur einu sinni komst á HM, þegar keppnin var haldin í Suður-Kóreu og Japan árið 2002.