Kovac: Þeir eru allir 190 cm og duttu eins og smábörn

Niko Kovac, landsliðsþjálfari Króatíu, gefur lítið fyrir óánægju Íslendinga með frammistöðu dómarans Alberto Undiano á Laugardalsvelli á föstudaginn.

„Ekki segja mér þetta. Þið sáuð leikinn - allir Íslendingarnir eru 190 cm á hæð og detta eins og smábörn,“ er haft eftir Kovac í króatískum fjölmiðlum.

Lars Lagerbäck, þjálfari Íslands, sagði eftir leikinn að hann væri afar óánægður með frammistöðu Undiano og leikmenn. Leikmenn liðsins tóku margir í sama streng.

Kolbeinn Sigþórsson verður ekki með Íslandi í Zagreb vegna meiðsla og líklegt að Eiður Smári Guðjohnsen taki stöðu hans í byrjunarliðinu. Kovac viðurkennir að hann sé góður leikmaður.

„OK, OK. Hann er vissulega góður og mikilvægur leikmaður í þeirra liði. En við ætlum ekki að hafa áhyggjur af honum í okkar nálgun á leikinn.“

Hann segist vera bjartsýnn fyrir seinni leikinn annað kvöld. „Ég vona - og er raunar sannfærður um að við verðum með álíka yfirburði í leiknum í Zagreb eins og í fyrri leiknum. Og að við munum fagna í leikslok.“