Modric: Veit ekki af hverju ég spilaði illa

Luka Modric ein stærsta stjarna króatíska landsliðsins í fótbolta veit ekki af hverju hann náði sér ekki á strik í fyrri umspilsleiknum gegn Íslandi í undankeppni heimsmeistaramótsins í fótbolta. Modric lofar að gera betur í Króatíu á þriðjudagskvöld.

Modric komst aldrei almennilega í gang á Laugardalsvellinum sem sást hvað best í vandræðagangi Króatíu við að skapa sér færi þrátt fyrir að vera manni fleiri í 40 mínútur. Modric er fullkomlega meðvitaður um þetta.

„Mér líður illa yfir frammistöðu minni í Reykjavík. Ég get ekki útskýrt hvað olli því að ég lék langt undir getu. Ég verð að gera betur,“ sagði Modric.

„Það er til mikils ætlast af mér það er mikil pressa á mér en það getur ekki verið afsökun fyrir frammistöðu minni á Íslandi. Ég get ekki útskýrt hvert vandamálið er,“ sagði Modric sem segir þetta muni þó gleymast fljótt þegar liðið hefur tryggt sér sæti á HM í Brasilíu.