Kovac: Þurfum stuðning frá fyrstu mínútu

Niko Kovac þjálfari króatíska landsliðins í fótbolta hefur biðlað til króatísku þjóðarinnar að fylla Maksimir-leikvanginn í Zagreb á þriðjudaginn þegar Króatía tekur á móti Íslandi í seinni umspilsleik þjóðanna fyrir heimsmeistaramótið í fótbolta.

Kovac er meðvitaður um það að liðið þurfi á miklum stuðningi að halda og að liðið þurfi að fá mark í leikinn sem fyrst svo stuðningsmenn liðsins fyllist ekki óþolinmæði og snúist gegn liðinu.

„Ég trúi því að við munum komast á heimsmeistaramótið í Brasilíu en við þurfum hjálp frá stuðningsmönnum Króatíu. Þeir þurfa að fylla leikvanginn og styðja liðið frá fyrstu mínútu,“ sagði Niko Kovac við endurkomuna til Zagreb.

Kovac sagði ekkert í leik íslenska landsliðsins hafi komið sér á óvart og að leikur liðsins hafi ekkert breyst við það að Ólafur Ingi Skúlason hafi verið rekinn af leikvelli á 50. mínútu.

„Við lékum vel varnarlega og vorum fljótir að bregðast við þegar við töpuðum boltanum en það sama verður ekki sagt um það þegar við þurftum að snúa til sóknar. Ég er ekki ánægður með þann hluta leiksins en við höfum enn tvo daga til að leggja línurnar og laga það,“ sagði Kovac.