Króatískir knattspyrnuáhugamenn trúa Vísi

Á vefsíðu Vecernji er búið að setja upp skoðanakönnun á meðal króatískra knattspyrnuáhugamanna í kjölfar fréttar Vísis um drykkju þeirra eftir leikinn gegn Íslandi á föstudag.

Valmöguleiki eitt í könnuninni er hvort fólk trúi því að leikmenn hafi drukkið 70 bjóra. Númer tvö er hvort þeir hafi fengið sér bjór en ekki svona mikið af honum. Þriðji kosturinn er hvort fólk trúi því að leikmennirnir hafi sleppt því að fá sér í glas.

Yfirgnæfandi meirihluti króatískra fótboltaáhugamanna, sem hefur tekið þátt í könnuninni, hefur trú á því að leikmenn hafi fengið sér í glas.

Þar af eru tæplega 60 prósent sem trúa frétt Vísis um að leikmennirnir átta hafi drukkið yfir 70 bjóra.

Aðeins 10 prósent trúa því að leikmennirnir hafi sleppt því að fá sér bjór eftir leik.

Vísir stendur að sjálfsögðu við fréttina enda með staðfestar heimildir fyrir því sem fram fór.