Forstjóri Landspítalans um fjárlögin: "Misskilningur sem verði leiðréttur“

„Ég geri ráð fyrir að þetta sé einhverskonar misskilningur sem verði leiðréttur,“ segir Páll Matthíasson, forstjóri Landspítalans. „Við gerum ráð fyrir því að stjórnvöld muni standa við orð sín frá því fyrir og eftir kosningar og veita raunverulega viðspyrnu en ekki bara hlý orð.“

Samkvæmt nýkynntum fjárlögum fær Landspítalinn ekki aukið rekstrarfé frá fyrra ári og eru framlög til spítalans í raun óbreytt. Frumvarpið gerir ráð fyrir að útgjöld ríkissjóðs vegna rekstrar spítalans nemi 38,5 milljörðum króna.

Tímabundið til þriggja ára 600 milljóna króna aukaframlag til spítalans vegna tækjakaupa er fellt niður. Og hagræðingarkrafa felur í sér hækkun á sértekjum sem stefnt er að því að náist með nýju legugjaldi.

Forstjóra Landspítalans segist vera brugðið vegna niðurskurðarins og þó hann hafi ekki búist við þeim 12-13 milljörðum króna sem sumir stjórnarþingmenn hafi rætt um fyrir og eftir kosningar hafi verið ljóst að andinn var sá að bæta í.

„Það lá fyrir að það ætti að styrkja þessa grunstoð íslensks heilbrigðiskerfi sem spítalinn er en það verða tóm orð ef við fáum ekki viðbótarfjármagn,“ segir Páll. Rekstrarhalli spítalans á þessu ári stefni nú þegar í  tæpan milljarð sem ekki verði bættur.  Sá halli er til kominn vegna  mjög aukinnar eftirspurnar,m.a.a vegna öldrunar þjóðarinnar og jafnlaunaátaksins sem ekki fékkst að fullu bætt.

„Þetta eru vissulega vonbrigði en við gerum ráð fyrir því að stjórnvöld standi við þau orð um að styrkja rekstur spítalans sem og tæki og aðstöðu á þeim vikum sem í hönd fara,“ segir Páll.

Ein helsta breytingin fyrir spítalann er niðurfelling á 600 milljóna króna framlagi vegna tækjakaupa.

„Það er alveg skýrt að LSH átti að fá um 900 milljónir króna á ári til tækjakaupa, þrjú ár í röð. Það átti að bæta við 600 milljónum með sérstökum styrk. Með þessu er búið að taka 2/3 af því fjármagni sem átti að fara í tækjakaup. Við byrjuðum að gera samninga um tækjakaup í ljósi fyrri áætlana. Ég geri ráð fyrir að stjórnvöld muni leiðrétta þetta með tækjastyrkinn og fjármagna okkar starfsemi eins og þarf,“ segir forstjórinn.

Páll tók við starfi forstjóra Landspítalans í dag. Þótt fjárlögin hafi komið honum á óvart segist hann ekki ætla að segja sig frá verkefninu.

„Það er erfitt að taka við svona verkefni í svona ástandi en einhver verður að halda því áfram. Nú er verkefnið að styrkja þjónustu spítalans, bæta líðan starfsfólks og auka starfsánægju. Það verður best gert með því að bæta aðbúnað og tækjakost,“ segir forstjórinn. „Það er langur tími að annarri umræðu um fjárlagafrumvarpið og ég held að það sé mikilvægt fyrir starfsfólk að það sinni sínu góða starfi, skýri sitt mál og berjist fyrir hagsmunum sjúklinga.“