Er kynorkan dofin - eða jafnvel týnd?

Hún Gunna er klár kona sem veit nákvæmlega hvað hún vill. Hún er þessi týpa sem bara fer og nær í það sem hún vill, tekur ákvarðanir og framkvæmir. Hún kemur krökkunum á fætur og í skólann, fer í ræktina og vinnuna, ákveður hvað eigi að vera í matinn, verslar, eldar og kemur krökkunum í rúmið. Hún skipuleggur líka fjölskyldufríin, verkefni heimilisins og hefur skoðun á öllu.  Gunnu gengur vel í flestu en hún Gunna týndi samt mojoinu fyrir löngu og skilur ekki af hverju félagslífið er lítið gefandi og kynlífið óspennandi.

Hæ, ég heiti Anita. Ég er súperkona, hamingjuþerapisti og sérfræðingur í frábæru týpunni. Flestar okkar hafa upplifað að týna mojoinu í erli dagsins en frá og með núna ætlar þú að vera heit mamma með mojoið í botni. Mojoið hefur ekkert að gera með stöðu okkar í lífinu og þau hlutverk sem við leikum heldur hvernig og hvort við kunnum að njóta. Við erum, því miður, svo gríðarlega upptekin af öllu sem þarf að vita, læra, ákveða og skipuleggja að við hreinlega festumst í höfðinu á okkur og flest allt sem býr neðan við háls bara gleymist og leggst í dvala. Innsæið, tilfinningarnar og ekki síst mojoið og kynorkan dofnar og jafnvel týnist. 

Leyfðu mojoinu að flæða, þrátt fyrir öll hlutverkin og vertu týpan sem allir dragast að, já sogast að og finnst algjörlega ómótstæðileg. Prófaðu eftirfarandi þrjú skref þó ekki væri nema einn dag og vittu hvort þú nærð ekki að virkja mojoið betur.

1. Vertu gordjöss

Farðu á fætur og klæddu þig eftir því hvernig þér langar að líða. Klæddu þig í liti, settu á þig skartgripi eða varalit eða hvað það sem þér finnst ýta undir kynþokka. Ekki vera eins og drusla í ræktinni og hvað þá heima hjá þér. Greiddu þér, þurrkaðu stírurnar, settu á þig ilm og fáðu þér sexý jógagalla fyrir kósýdagana heima. Fegurðin kemur vissulega innan frá en það er algjör óþarfi að vaða yfir hana með óþarfa andvaraleysi eða subbuskap.

2. Njóttu núna

Lokaðu augunum og finndu bragðið og ilminn af kaffibollanum. Borðaðu hægt og njóttu hvers einasta bita. Hættu að hlaupa, líttu upp og opnaðu augun. Borðaðu eins og Ítali og elskaðu eins og Frakki. Leyfðu öllu að taka sinn tíma, hallaðu þér aftur á bak og njóttu. Settu færri verkefni á listann, skipulegðu betur og settu njóta í forgang.

3. Vertu áhugasöm

Kveiktu á jákvæðni og áhuga gagnvart öllu sem gerist í kringum þig. Kveiktu á áhuga gagnvart fólkinu sem þú umgengst, hrósaðu af einlægni og spurðu hvað það gerði skemmtilegt í dag eða afrekaði. Vittu til þú færð miklu áhugaverðari svör heldur en þessi "hvað er að frétta" svör. Hlustaðu með opnum huga og sjáðu hvort viðkomandi kveiki einhverjar hugmyndir hjá þér.

4. Losaðu um

Umfram allt, losaðu um alla stífni í líkamanum. Teygðu á, farðu í jóga, sund eða nudd. Losaðu um bólgur og herping og finndu mýkt og flæði. Opnaðu faðminn, hallaðu þér fram þegar þú talar við fólk og settu bros í andlitið. Síðast en ekki síst, hreyfðu mjaðmirnar rólega, hvort sem þú situr, stendur eða gengur og losaðu um alla kvenlegu orkuna sem býr í þér. Vittu til, þú ferð í allt annan gír og verður gjörsamlega ómótstæðileg.

Ekki leyfa verkefnalistanum, stundaskránni og stjórnuninni að yfirtaka líf þitt. Hægðu á þér, slepptu taumnum og leyfðu lífinu að koma þér á óvart. Njóttu litlu hlutanna og vertu gordjöss.

Mundu að þeir sem eru tilbúnir að ganga alla leið og opna fyrir allt sem lífið hefur upp á að bjóða er velkomið að panta fríar 15 mínútur í örstefnumótun á http://AntaSig.com/bookings .

Vertu frábær, Anita

AnitaSig.com