Segir enga spennu á milli hátíðanna

„Það var einhver aktívismi í gangi fyrir framan Laugardalshöllina en það var ekkert á okkar vegum. Við héldum bara okkar eigin hátíð á okkar vegum í Þróttaraheimilinu," segir Anna Pála Sverrisdóttir, formaður Samtakanna '78, en mannréttindahátíð samtakanna, Glæstar vonir, fór fram í dag á sama degi og hin umdeilda Hátíð vonar. Fregnir bárust af því að spenna hefði myndast á milli hátíðargestanna en Anna Pála segir ekkert til í því. 

Mikil umræða hefur verið um Hátíð Vonar síðan ljóst var að predikarinn Franklin Graham yrði viðstaddur hátíðina, en Graham er umdeildur vegna skoðana sinna á samkynhneigð. Að sögn hátíðargesta og var fullt út úr dyrum í Laugardalshöllinni í kvöld.

Regnbogabrautin aftur fjarlægð

Regnbogabrautin sem lögð var í Laugardalnum í gær hefur einnig verið fjarlægð á nýjan leik. „Þetta finnst mér afskaplega dularfullt. Nú er tvisvar búið að setja hana upp og hún svo fjarlægð í tvígang. Eftir alla þessa fjölmiðlaumfjöllun hefur öllum verið ljóst að þetta var á vegum Reykjavíkurborgar svo það verður afar athyglisvert að sjá hver var þarna að verki," segir Anna Pála jafnframt.

Dagur B. Eggertsson, formaður borgarráðs, segir dapurlegt að regnbogabrautin fái ekki að vera í friði.„Þegar við settum þetta upp í seinna skiptið þá settum við filmur sem sérstaklega eru ætlaðar til þess að festa þetta á malbik, svo ég held að það hafi þurft að hafa ansi mikið fyrir því að fjarlægja þetta. 

Spurður að því hvort til standi að setja brautina upp í þriðja skiptið segir Dagur að sé ekki farið að ræða þau mál enn sem komið er.„Það er sem þó öruggt er að við munum halda áfram að stuðla að litríkri og fallegri borg, þar sem allir eiga sitt rúm og sitt pláss, og þar sem borin er virðing fyrir náunganum."