Framtíð nýs Landspítala skýrist í fjárlögum

Það skýrist í fjárlagafrumvarpinu sem lagt verður fram eftir tvær vikur hvort vinna við byggingu nýs Landspítala heldur áfram. Gunnar Svavarsson, formaður byggingarnefndar vegna spítalans, segir að tryggja þurfi verkefninu rúmlega 100 milljónir í fjárlögum ef ljúka á fullnaðarhönnun vegna minnsta verkhluta verkefnisins.

Í stefnuyfirlýsingu ríkisstjórnarinnar segir: „Húsakostur Landspítala er óviðunandi. Leggja þarf áherslu á viðhald og endurbætur á núverandi húsa- og tækjakosti stofnunarinnar þar til varanleg lausn fæst.“

Gagnályktað hefur verið frá þessu á þann veg að ekki sé á stefnuskrá ríkisstjórnarinnar að ljúka byggingu nýs Landspítala.

Samt er undirbúningur vegna verkefnisins langt á veg kominn. Forvali lauk vegna útboða fyrr í sumar og voru þrír hópar metnir hæfir til að taka þátt í lokuðum aðskildum útboðum fyrir 58.500 fermetra meðferðarkjarna og um 14.000 fermetra rannsóknarhús við Landspítalann. Þá voru fimm hópar metnir hæfir til að taka þátt í útboðum fyrir um 21.300 fermetra bílastæðahús og um 4.000 fermetra sjúkrahótel við Landspítalann. Deilskipulag vegna spítalans var unnið í vor og ekki kært.

Gunnar Svavarsson, formaður stjórnar Nýs Landspítala ohf. og formaður byggingarnefndar, segir að framhaldið ráðist í fjárlögum næsta árs og næstu ára.

Ef ekki verður gert ráð fyrir verkefninu í fjárlögum næsta árs er þá sjálfhætt? „Já, eða að eigandi verkefnisins, þ.e ríkisvaldið, taki ákvörðun um að skoða verkefnið á annan hátt. Eða þá að bíða með verkefnið,“ segir Gunnar.

Kristján Þór Júlísson, heilbrigðisráðherra, sagði í þættinum Pólitíkinni með Höskuldi Kára Schram hér á Vísi að ótímabært væri að fara af stað með byggingu spítalans í heild sinni núna en sagðist tilbúinn að skoða verkefnið í áföngum eða minni útfærslur.

Hvað þarf mikla fjárveitingu til verkefnisins á fjárlögum næsta árs til að koma því áfram á næsta fasa? „Það veltur á því hvaða verkhlutar eru teknir áfram. Minnsti verkhlutinn er sjúkrahótelið. Til þess að halda því áfram og klára fullnaðarhönnun þarf rúmar hundrað milljónir króna á fjárlögum næsta árs svo hægt sé að bjóða út fullnaðarhönnun á því verki,“ segir Gunnar Svavarsson.