Ljósanótt mögulega framlengd. Flugeldasýning verður í kvöld.

Stormur gekk yfir vesturhluta landsins í gær með miklu hvassviðri og úrkomu. Lögregla sinnti ýmsum útköllum vegna þessa og víða fuku vinnupallar, þakplötur og annað lauslegt. Björgunarsveitir sem kallaðar voru út á höfuðborgarsvæðinu luku verkefnum sínum fyrir miðnætti og gekk veðrið á vestanverðu landinu niður fljótlega eftir það.

Veðrið hafði sín áhrif á menningar- og fjölskylduhátíðina Ljósanótt og segir Árni Sigfússon, bæjarstjóri í Reykjanesbæ, að þurft hafi að aflýsa útidagskrá gærkvöldsins. „Það voru svo miklar hryðjur að öryggisins vegna þurftum við að slá af útihátíðina en hér var heilmikið ball og að sögn lögreglu gekk allt vel og við erum bara ánægð með það,“ segir Árni.

Hátíðin heldur áfram í dag og má finna upplýsingar á netsíðunni ljosanott.is. Tilraunir til að setja upp dagskrá á útisviðinu í kvöld hafa þó enn ekki gengið eftir. „En hver veit nema við bara framlengjum þetta inn í vikuna og höldum tónlistarveislu, hluta af því sem átti að vera á sviðinu í gærkvöldi. Það er verið að spá í það, við reynum bara að gera gott úr þessu.“

Árni segir að vissulega hafi þetta verið leiðinlegt fyrir skipuleggjendur sem höfðu lagt mikla vinnu á sig. „Auðvitað taka menn svona nærri sér en það er nú ofjarl að berjast við veðurguðina svo það þarf bara að taka þessu af yfirvegun. Þetta er auðvitað líka leiðinlegt fyrir hljómsveitir sem voru búnar að undirbúa sig og heilmikið flott prógramm.“

Flugeldasýningu sem átti að vera hápunktur gærdagsins verður í staðinn skotið upp klukkan tíu í kvöld og best er að fylgjast með henni frá hátíðarsvæðinu á Bakkalág. „Við getum alveg lofað því. Ég held það hafi ekki blotnað mikið í þessu úrhelli sem varð hérna einmitt þegar allt átti að fara í gang. En við erum svo sem vön ýmsu Íslendingar, svo við hristum þetta af okkur,“ segir Árni Sigfússon, bæjarstjóri í Reykjanesbæ.