Ökumenn bíði í 18 klukkutíma frá síðasta drykk

Um tuttugu prósent banaslysa í umferðinni eru af völdum ökumanna sem eru undir áhrifum áfengis, samkvæmt tölum samgöngustofu. Kynningastjóri hennar segir mikilvægt að ökumenn taki enga áhættu varðandi neyslu áfengis eða annarra vímuefna og séu velvakandi í umferðinni.

Óhætt er að segja að verslunarmannahelgina sé eina stærsta ferðahelgi ársins.

Einar Magnús Magnússon hjá Samgöngustofu segir hinsvegar að mynstrið hafi breyst síðustu ár.

„Við erum ekki að sjá neina toppa hvað slysatíðni varðar um verslunarmannahelgina eins og oft áður var, þegar þetta var eina stóra ferðahelgin. Þetta hefur breyst svolítið mikið núna á undanförnum árum, það eru orðnar fleiri ferðahelgar sem eru jafnvel jafnstórar og með jafnmikilli umferð og verslunarmannahelgin,“ segir hann.

Mikilvægt sé að ökumenn haldi fókus.

„Og vera ekki að láta síma eða vímuefni, hvort sem þau heita áfengi eða eitthvað annað, trufla dómgreindina. Það er líka mikilvægt að halda jöfnum hraða, það verður þung og mikil umferð. Ekki vera að fara að óþörfu fram úr.“

Þarft ekki að vera yfir mörkunum

Einar Magnús bendir á að tryggingarfélög eigi endurkröfurétt á hendur ökumanni sem veldur slysi undir áhrifum vímuefna eins og áfengis, og magn þess í blóði þarf ekki að ná refsimörkum, þ.e. 0,5 prómillum til að hægt sé að gera slíka kröfu á hendur ökumanni. Verði ökumaður undir áhrifum valdur af banaslysi verði hann ákærður fyrir manndráp á af gáleysi.

„Það er ekki alveg eins fljótt að renna úr okkur áfengið, eins og við stundum virðumst halda. Það er ekki alveg runnið af okkur þó að okkur þykir við ofsalega skýr í kollinum þá er áfengið ekki runnið úr blóðinu. Það er ennþá að skerða dómgreind okkar, viðbragð og athygli. Menn verða að láta góðan tíma líða, stundum borgar sig að bíða í 18 klukkustundir frá því að síðasta drykkjar var neitt þar til af stað er lagt.“

Eyðir meira á 120 kílómetra hraða

Þá vekur Einar Magnús athygli á því að ökumaður sem ekur á 120 kílómetra hraða kemst aðeins nokkrum mínútum fyrr á áfangastað en sá sem ekur á 90 kílómetra hraða.

„Þegar menn sjá hversu litlu munar þá sjá þeir að þetta er fullkomið tilgangsleysi fyrir utan þá áhættu sem að menn eru að taka. Ég tala nú ekki um það á þessu síðustu og verstu tímum hvað varðar eldsneytiskostnað, þá ertu að henda þarna peningum út um gluggan fyrir bókstaflega ekki neitt.“