Egypski herinn lætur til skarar skríða

Brynvarðar bifreiðar egypska hersins eru víða á götunum í Kaíró ásamt vopnuðum hermönnum. Múhamed Morsi forseti hefur verið kyrrsettur, en enn er þess beðið að herinn gefi út yfirlýsingu.

Dagblaðið Al Ahram, sem gefið er út af egypska ríkinu, segir reiknað með því að Morsi annað hvort segi af sér eða honum verði gert að hætta. Eftir það taki þriggja manna forsetaráð við völdum, en formaður þess verði aðaldómari hæstaréttar landsins.

„Í þágu Egyptalands og sögulegrar nákvæmni þá skulum við kalla það sem er að gerast sínu rétta nafni: Herforingjabyltingu,” skrifaði Essam al Haddad, þjóðaröryggisráðgjafi Morsi forseta, á Facebook-síðu sína.

Á vefsíðu The Guardian er hægt að fylgjast með fréttum, sjá myndönd og myndir frá Kaíró er þær berast í gegnum Twitter.