Andrúmsloftið er rafmagnað og þjóðin er klofin

Stuðningsmenn Bræðralags múslima og leiðtogans fyrrverandi, Múhameds Morsi, hafa mótmælt valdaráninu í Egyptalandi nær sleitulaust undanfarna daga.

Stjórnarherinn steypti Morsi af stóli í síðustu viku en þá hafði Morsi, fyrsti lýðræðislega kjörni forseti landsins, aðeins setið á embættisstól í eitt ár.

Bræðralag múslima hefur hvatt fylgismenn sína til uppreisnar og tugþúsundir hafa svarað því kalli. Nú þegar hafa fimmtíu látist í átökunum.

„Á meðan við vorum að biðjast fyrir kom lögreglan okkur að óvörum og hóf skothríð á okkur á meðan við báðumst fyrir," sagði Mohamed Rashed íbúi í Kaíró.

„Þeir skjóta beint í brjóstið, höfuðið, hálsinn, kviðinn, í þindina. Þetta eru allt banvæn skot," sagði Mohamed Zanaty, læknir.

Bræðralagið hefur farið fram á það að alþjóðasamfélagið beiti sér í málinu, ellegar sé hætta á að ástandið í Egyptalandi þróist yfir í borgarastyrjöld, líkt og í Sýrlandi.

Við töluðum við Sigrúnu Valsdóttur, bóksala í Kaíró, fyrir helgi, stuttu eftir að Morsi hafði verið steypt af stóli. Sigrún segir andrúmsloftið í höfuðborginni hafa versnað verulega síðustu daga.

„Það er meiri ólga í lofti og andúð á milli hópa. Orðræðan og það sem er í gangi er svolítið neikvæð. Það er mikið hatur á milli hópa."

Sigrún hefur búið í Egyptalandi í tólf og fylgst með þeirri ótrúlegu þróun sem orðið hefur á samfélagi Egypta síðustu ár. Hún var ekki fylgjandi mótmælunum gegn Morsi en segir það besta í stöðunni fyrir Bræðralagið að halda að sér höndum þangað til í næstu kosningum.

„Það sem kemur ekki á óvart að því leytinu til er að þetta er ekki í fyrsta skipti sem herinn ræðst að mótmælendum. Það gerðist meðan þeir voru við völd eftir að Mubarak fór frá, fyrir framan ríkissjónvarpið þar sem yfir 20 manns létust og fyrir framan þingið. Þetta er ekki í fyrsta skiptið sem þeir reyna að koma mótmælendum frá. Það eru engin auðveld svör og þetta er mjög flókið mál. Því miður er þjóðin klofin eins og stendur."