Enn mikil vinna eftir

Í dag eru níutíu og átta ár frá því að konur, sem voru orðnar 40 ára og eldri, fengu kosningarétt til Alþingis. Enn er mikil vinna eftir í jafnréttismálum, segir framkvæmdastýra Jafnréttisstofu.

Þennan dag árið 1915 máttu konur sem náð höfðu 40 ára aldri kjósa í alþingiskosningum og rétt til að bjóða sig fram til Alþingis. En með breytingu á stjórnarskránni, sem gengu í gegn fimm árum síðar eða árið 1920, fengu allar konur kosningarétt til jafns við karla.

Kristín Ástgeirsdóttir, framkvæmdastýra Jafnréttisstofu, segir að dagurinn í dag sé mikill merkisdagur sem hafi verið haldið upp á síðustu tæplega hundrað ár. Þrátt fyrir að mikill árangur hafi náðst í jafnréttisbaráttunni hér á landi sé enn mikil vinna eftir.

„Það sjáum við á launamisréttinu, í stjórnum fyrirtækja, yfirráðum yfir auðlindunum og á Alþingi þar sem varð fækkun á konum og í ríkisstjórn. Við sjáum það einnig í ofbeldismálunum, það er mikið verk eftir að vinna við breyta hugmyndum karla um konur og kvenna um karla. Og kvenna um sjálfan sig og karla um sjálfan sig svo að fólk fái notið sín í lífi og starfi, sé ekki bundið einhverjum hömlum um það hvernig karlar eiga að vera og hvernig konur eiga að vera," segir hún.

Nóg verður um að vera í dag í tilefni dagsins. Á Akureyri verður farin kvennasöguganga um Oddeyrina og í Reykjavík verður lagður blómsveigur að leiði Bríetar Bjarnhéðinsdóttur í gamla kirkjugarðinum við Suðurgötu, og síðan verður gengið þaðan að Hallveigarstöðum þar sem verða kaffiveitingar í boði.