Laxeldi á Vestfjörðum eins og ígildi álvers

Uppbygging laxeldis stefnir í að hafa sambærileg og jafnvel meiri áhrif á sunnanverðum Vestfjörðum og stóriðjuframkvæmdirnar höfðu fyrir Austurland, segir bæjarstjóri Vesturbyggðar. Húsnæðisverð er þegar farið að rjúka upp.

Matthías Garðarsson, aðaleigandi Arnarlax, segist tala af reynslu frá Noregi þegar hann segi að mörghundruð störf geti skapast við laxeldið, bara í kringum Arnarfjörð.

Áhrifin eru þegar farin að sjást. Fyrirtækið Fjarðalax er komið með nærri fjörutíu manns í vinnu og stefnir á fleiri. Arnarlax er kominn með sjö manns við seiðaeldisstöð, en stefnir á sextíu starfsmenn eftir þrjú ár og 150 eftir sjö ár.

„Ég hugsa að það megi alveg bera þetta saman við uppbygginguna á Austurlandi á sínum tíma þegar álverið í Reyðarfirði var byggt," segir Ásthildur Sturludóttir, bæjarstjóri Vesturbyggðar, í viðtali á Stöð 2. Laxeldið geti jafnvel verið stærra fyrir þetta svæði. Ef allt gangi eftir sé starfsmannafjöldinn tvöföldun á íbúafjölda á Bíldudal.

„Bara sú uppbygging sem hefur orðið hjá Fjarðalaxi nú þegar er stórkostleg innspýting inn í samfélagið og er upp á marga milljarða," segir bæjarstjórinn.

Húsnæðisverð er farið að rjúka upp í Vesturbyggð og kominn þrýstingur á launin. Þeir sem vilja fólk í vinnu þurfa helst að yfirborga.  Ásthildur segir að erfitt hafi verið að fá fólk í sumarafleysingar og sumarstörf.

„Það er bara það mikið í boði. Það er bara farið í það sem býður best."

Þá segir hún fasteignaverð heldur betur farið að hækka. Fasteignamatið á svæðinu muni hækka mjög mikið á þessu ári.