„Ég sá hann með mínum eigin augum“

„Ég sá hann með mínum eigin augum," segir útvarpskonan Ósk Gunnarsdóttir, en í morgun sá hún bandaríska leikarann og samkvæmisljónið Charlie Sheen ganga inn á hótel í miðbæ Reykjavíkur.

„Hann var þarna fyrir utan hótelið með tveimur risastórum lífvörðum og einni af kærustum sínum, þarna klámmyndaleikkonunni. Það var hálfgert kaos þarna fyrir utan hótelið og einhverjum gestum meinaður aðgangur, en ég strunsaði bara þarna inn."

Starfsmenn hótelsins neituðu að þarna væri leikarinn á ferðinni, en Ósk segist viss í sinni sök og kveðst einnig hafa aðrar heimildir fyrir því að hann sé hér á landi. Hún veit þó ekki í hvaða tilgangi heimsóknin er.

„Ég hef ekki hugmynd. Kannski er hann að fara á Aldrei fór ég suður eða eitthvað."

Sheen á að baki farsælan feril sem kvikmyndaleikari, en síðustu ár hefur hann meira verið í sviðsljósinu vegna undarlegra uppátækja sinna. Hann hefur margsinnis farið í meðferð vegna áfengis- og vímuefnavanda síns, og verið í sambandi með ótal klámmyndaleikkonum. Þá var hann rekinn úr sjónvarpsþáttunum Two and a Half Men árið 2011 fyrir að lýsa frati á framleiðendur þáttanna í viðtölum.