Selja boli til styrktar Ingólfi ljósmyndara

„Hann er búinn að vera á hliðarlínunni síðan hljómsveitin var stofnuð," segir Snæbjörn Ragnarsson bassaleikari Skálmaldar um Ingólf Júlíusson ljósmyndara.

Hljómsveitin hefur sett í sölu stuttermabol til styrktar Ingólfi, en hann er óvinnufær vegna baráttu sinnar við bráðahvítblæði. Krabbameinsmeðferð hefur ekki skilað árangri og hefur því verið hætt.

„Hann er alltaf að lána okkur græjur og gera eitthvað fyrir okkur. Hann hefur líka setið fyrir í ljósmyndatökum með okkur í fullum skrúða, og þessi mynd er úr einni þannig tökunni. Já, þetta er sem sagt hann á bolnum."

Á bolnum stendur Ingólfur vígalegur með skjöld, sveiflandi öxi, og það er Blekholt.is sem er með bolinn til sölu.

Þetta er ekki í fyrsta sinn sem Skálmaldarmenn láta til sín taka á sviði góðgerðarmála, en óttast þeir ekki að ímynd þeirra sem þungarokksharðjaxlar laskist við öll góðverkin?

„Við erum bara ekki svoleiðis gaurar. Við til dæmis brosum uppi á sviði, það má. Við bara erum ekkert gaurarnir sem hella yfir sig svínablóði og skera sig á púls. Okkur finnst þetta bara gaman og erum ekki að reyna að halda í neina ímynd," segir Snæbjörn og hlær.