Made in sveitin verður aldrei í háskerpu

Vísir frumsýnir hér glænýtt myndband við lagið Í nótt með hljómsveitinni Made in sveitin. Hreimur Örn Heimisson söngvari er forsprakki sveitarinnar. Myndbandið er framleiðsla beint frá býli, gert af Hreimi sjálfum og öðrum hljómsveitarmeðlimum. "Hér er meira lagt upp úr gleði en gæðum. Við felum það ekkert. Made in sveitin verður aldrei í háskerpu. Við getum ekki þóst vera einhverjir sem við erum ekki," segir Hreimur og hlær. Myndbandið var tekið í Þorlákshöfn á dögunum og tóku nemendur úr grunnskóla bæjarins meðal annars þátt í gerð þess. Í nótt er fyrsta lagið sem Made in sveitin sendir frá sér. Ásamt Hreimi skipa Róbert Dan, Árni Þór, Ívar og Jón Guðfinns sveitina en þeir hafa spilað saman undir merkjum Made in sveitin í nokkur ár. Sveitin leggur land undir fót á næstu dögum og fer í páskatúr. Föstudaginn 29. mars treður hún upp í Mælifelli á Sauðárkróki, þann 30. á Siglufirði og 31. í Gamla Kaupfélaginu á Akranesi.