Trainspotting 2 í bígerð

Óskarsverðlaunaleikstjórinn Danny Boyle undirbýr nú framhald af kvikmyndinni Trainspotting frá árinu 1996, en það er myndin sem kom honum á kortið.

Trainspotting sagði frá lífi heróínfíkla í Edinborg og innsiglaði þær vinsældir sem Boyle hafði áunnið sér áður með myndinni Shallow Grave. Trainspotting sló í gegn og hefur ferill Boyle legið upp á við síðan.

Líklegast náði hann hámarki þegar hann fékk Óskarsverðlaun fyrir bestu leikstjórn kvikmyndarinnar Slumdog Millionaire frá árinu 2008, en nú segir Boyle að hann vonist til að hefja tökur á Trainspotting 2 árið 2016 - tuttugu árum eftir frumsýningu fyrri myndarinnar.

Boyle er handviss um að sér takist að sannfæra stjörnuna Ewan McGregor til að endurtaka rullu sína sem Mark Renton, en það var hlutverkið sem skaut honum upphaflega á stjörnuhimininn.

Boyle ætlar einnig að reyna að fá aðra leikara til að snúa aftur, en ljóst er að skiptar skoðanir verði á þessu framtaki leikstjórans, enda á Trainspotting marga dygga aðdáendur sem kæra sig ef til vill ekki um að hróflað verði við arfleifð myndarinnar.