Réttað yfir Lindsay Lohan

Leikkonan Lindsay Lohan hefur margsinnis komist í kast við lögin, og nú gæti hún átt yfir höfði sér langa fangelsisvist.

Henni er gefið að sök að hafa logið að lögreglumönnum þegar hún lenti í árekstri í júní í fyrra. Lohan sagðist ekki hafa verið undir stýri, og verði hún sakfelld fyrir að ljúga að lögreglunni er hún þar með að rjúfa skilorð, en hún var dæmd fyrir búðarhnupl árið 2011.

Réttarhöldin hefjast í dag í Los Angeles og segja lögfróðir menn að hún muni sennilega ekki sleppa með skrekkinn í þetta sinn. Hún hefur áður lent í árekstrum og sagst vera farþegi, og líklegt þykir að saksóknarinn reyni að færa rök fyrir því að það hafi einnig verið lygi.