Sjónvarpsstjörnur í Kolaportinu á sunnudag

Sjónvarpskonurnar Sigrún Ósk Kristjánsdóttir og Ragnhildur Steinunn Jónsdóttir ætla að rýma til í fataskápunum hjá sér og selja í Kolaportinu á sunnudag.

"Margt af þessu er lítið og jafnvel ekkert notað. Það fylgir sjónvarpsstarfinu að þurfa að vera iðinn við fatakaup svo þetta safnast upp í skápunum. Við erum líka aðeins breiðari um okkur núna en venjulega og pössum ekki í þetta allt. Það er því um að gera að koma þessu í umferð," segja vinkonurnar í gamansömum tón en báðar eiga þær von á sínu öðru barni.

"Við ætlum að selja þetta ódýrt, ætlum ekki að bera þetta aftur heim. Langflest er á 1, 2 eða 3 þúsund krónur," segja þær. "Það er markmiðið að allir geti gert þarna góð kaup og við hvetjum fólk til að mæta snemma því þetta klárast oft fljótt."

Meðal þess sem er til sölu er fatnaður sem Ragnhildur Steinunn hefur klæðst í Dans, dans, dans og merki á borð við BOSS, Karen Millen og fleiri sem Sigrún hefur klæðst í Íslandi í dag. "Svo erum við líka með fylgihluti, veski, belti, klúta og allt mögulegt."

Kolaportið er opið á sunnudag klukkan 11-17.

Sjá Facebooksíðu viðburðarins hér. 



Sigrún Ósk gengur með sitt annað barn og það sama á við um vinkonu hennar Ragnhildi Steinunni.