Bólusetning við HPV nær ekki til samkynhneigðra karla

Tuttugu Íslendingar greinast árlega með krabbamein í munni sem myndast hefur af völdum HPV-sýkingar og eru karlar þar í meirihluta. Hægt er að bólusetja drengi gegn veirunni og hófu Ástralar að gera það þeim að kostnaðarlausu í ár.

Byrjað var að bólusetja 12 ára stúlkur hér á landi gegn HPV-veirunni, sem veldur leghálskrabbameini, haustið 2011 en þegar stúlkur eru bólusettar svo ungar er ávinningurinn mestur. Danir eru að mati Vilhjálms Ara Arasonar heimilislæknis skrefi framar hvað þetta varðar en þeir hófu í fyrra að bjóða konum til 26 ára upp á slíkar bólusetningar.

„Ávinningurinn er minnkandi eftir því sem konur eru eldri en hann er jafnt og þétt minnkandi alveg fram undir þennan aldur. Og þess vegna vilja Danir bólusetja konur til þess aldurs til að ná sem mestu hjarðónæmi, það er að segja fækka tíðni á krabbameinum og reyndar líka kynfæravörtum. Þannig vilja þeir verja konurnar og líka karlana en þessi bólusetning nær reyndar ekki til samkynhneigðra karla og það er kannski svolítið annað áhyggjuefni."

Aðspurður segir Vilhjálmur áhrif veirunnar á karlmenn næstum þau sömu og á konur nema staðsetning krabbameinsins sé önnur.

„"Krabbameinslæknar eru að greina 20 tilfelli á ári af krabbameini í munni sem er HPV-orsökuð, karlar eru þar í meirhluta."

Hann segir dánartíðni þessa krabbameina af völdum HPV víða í heiminum hærri en leghálskrabbamein kvenna.

Hægt er að bólusetja drengi gegn HPV-veirunni og hafa Ástralar til að mynda byrjað að bólusetja þá ókeypis og í Kanada og Bandaríkjunum er mælt með þeim.

„Það er til mikils að vinna að ná þessum báðum hópum og samkynhneigðum körlum líka," segir Vilhjálmur Ari.