Hættu að hanga á netinu og lestu þetta

Margir Íslendingar hafa eflaust eytt megni af deginum á internetinu til að fylgjast með óveðrinu. Við höfðum samband við Jóhönnu Þórarinsdóttur einkaþjálfara og norðurlandameistara í bekkpressu til að spyrja hvaða áhrif þriggja tíma seta fyrir framan tölvuna hefur á líkama og sál netnotenda.

"Það er ekki gott að sitja lengur en einn klukkutíma í senn fyrir framan tölvu. Gott er að standa upp og ná sér í mat, drekka eitthvað og labba um. Það er mikilvægt að virða klukkutíma regluna. Það er auðvelt að detta í sukkið þegar maður er fastur heima á netinu. Þess vegna þarf fólk að muna að borða á þriggja tíma fresti. Ég mæli með því að það fái sér safaríka ávexti," segir Jóhanna.

Áttu lausnir fyrir netnotendur á degi sem þessum?

"Já það er ekkert mál að hreyfa sig heima. Við hjá fitnessform.is erum einmitt með prógröm á síðunni okkar sem fólk getur gert heima eins og hnébeygjur, armbeygjur, kviðæfingar, framstig og froskahopp. Ég ráðlegg fólki að taka tuttugu endurtekningar til að svitna og fá púlsinn upp," segir Jóhanna sem veit hvað hún syngur þegar kemur að líkamsrækt.