Instadjamm á Selfossi - snjallsími í verðlaun

Í kvöld verður nóg um að vera í Hvíta húsinu á Selfossi en þá fer fram #instadjamm. Þeir sem búa á Suðurlandi, eiga snjallsíma og nota ljósmyndaforritið Instagram ættu að kíkja, segja skipuleggjendur.

„Þetta virkar þannig að allir þeir sem mæta í partíið mega taka eins margar myndir og þeim lystir svo lengi sem þau merkja hana #instadjamm. Síðan eftir helgina skoðum við ljósmyndirnar og eru þær svo sendar á dómnefnd sem síðan velur þrjár bestu myndirnar. Þær birtast síðan á instagram-síðu Séð og Heyrt," segir Telma Rún Jónsdóttir, ein af skipuleggjendunum, í tilkynningu.

Meðal þeirra sem sitja í dómnefndinni eru Björk Eiðsdóttir, ritstjóri Séð og Heyrt, Sumarliði Þorsteinsson, hugsanlega fyrsti "al-íslenski" geimfarinn og Thorbjörn Einar, tónlistarmaður úr Úlf Úlf og fatahönnuður.

Verðlaunin eru ekki af verri endanum sá sem tekur flottustu myndina eða skemmtilegustu að mati dómnefndarinnar fær glænýjan snjallsíma.

Fyrsta #instadjamm-ið var haldið á skemmtistaðnum Center í Reykjanesbæ en yfir tvö hundruð ljósmyndir bárust dómnefndinni eftir það kvöld og fylgja nokkrar þeirra þessari frétt.

„Við vissum ekkert hvernig viðbrögð við myndum fá en til þess að gera langa sögu stutta þá var bókstaflega troðið og allir mjög ánægðir með að blanda instagram-forritinu í þetta. Þannig tókst okkur líka að brjóta upp þetta hefðbundna djamm," segir Telma Rún sem býst við fjölmörgum í kvöld.

Plötusnúðurinn og útvarpsmaðurinn af FM957, Yngvi Eysteins, þeytir skífum á kvöldinu en honum til halds og trausts er fyrrum samstarfsmaður hans Atli Már.

Hér er viðburðurinn á Fésbókinni þar sem hægt er meðal annars að vinna fría miða á kvöldið