Kynntist Hemma ekki fyrr en á unglingsaldri

Edda Hermannsdóttir hefur slegið í gegn sem spyrill í Gettu betur. Hún stýrir einnig vefsjónvarpi Viðskiptablaðsins og kennir líkamsrækt eldsnemma á morgnanna. Samt sem áður er hún fyrst og fremst þekkt fyrir að vera dóttir Hemma Gunn. Edda prýðir forsíðu tímaritsins Nýtt líf sem kemur út á morgun. Hún lýsir undrun sinni á því hve mikla athygli samband hennar við Hemma Gunn, vakti þegar hún tók við starfi spyrils Gettu betur. "Ég er alls ekki að reyna fela okkar tengsl en mig langar bara að fá að vera ég,“ segir Edda í viðtali við Mörtu Goðadóttur. Hún ólst upp hjá móður sinni Emilíu Jóhannsdóttur og stjúpföðurnum Eiði Guðmundssyni en í viðtalinu talar hún fallega um Hemma og segir frá eðli sambands þeirra. "Ég var sex mánaða þegar mamma mín kynntist Eiði pabba. Ég lít á hann sem föður minn en vissi alltaf að ég ætti annan pabba. Hemmi hitti mig fyrst þegar ég var smábarn og svo sá ég hann ekki aftur fyrr en ég var sjö ára en ég bjó erlendis með foreldrum mínum fram að þeim tíma.Við vorum í raun ekki í sambandi fyrr en ég komst á unglingsaldur.“