Farðar fræga fólkið í London

Margrét Magnúsdóttir fluttist til London í ágúst 2011 og hóf förðunarnám við Delamar Academy. Námið átti svo sannarlega eftir að vinda upp á sig og rúmum tveimur árum síðar hefur Margrét starfað við að farða stórstjörnur fyrir kvikmyndir, tónlistarmyndbönd og sjónarpsþætti.

Margrét segir förðunaráhugann hafa kviknað þegar hún var í Versló, en þar starfaði hún við hinar ýmsu leiksýningar og myndatökur. Í kjölfarið fór hún að vinna einstök verkefni með ljósmyndurum og ekki leið á löngu þar til hún vissi fyrir víst að þetta væri sá bransi sem hana langaði til að starfa innan. Hún sótti um í Delamar Academy í London þar sem hún segist hafa fengið frábæra menntun í faginu. Boltin byrjaði svo að rúlla fljótlega eftir það.

Hver eru þín stærstu verkefni hingað til?

„Ég er búin að vera mjög heppin og fá frábær tækifæri út frá skólanum. Um viku eftir útskrift fékk ég símtal og þá hafði einn kennarinn mælt með mér í starfsreynslustöðu fyrir kvikmyndina Great Expectations. Ég fékk svo annað flott tækifæri að farða fyrir tónlistarmyndbands rapparans Will.I.Am - This is Love, og var það var ótrúlega skemmtileg reynsla. Svo hef ég verið að vinna við önnur verkefni eins og Asian Music Awards, tökur fyrir þætti eins og matreiðsluþátt og minni grínþætti, ásamt því að farða í ljósmyndastúdíóum."

Hvernig reynsla er það að starfa á svona flottu setti með heimsfrægu fólki?

„Það er ótrúlega gaman. Að koma inn á sett í Great Expectations var eins og að koma inn í annan heim. Þetta var líka svo stuttu eftir útskrift hjá mér og mér var alveg hent út í djúpu laugina. Ég hafði aldrei séð neitt þessu líkt áður, hvað þá hitt stórstjörnur á borð við Ralph Fiennes og Jeremy Irvine.

Eru einhver spennandi verkefni á döfinni hjá þér?

„Ég er að koma heim til Íslands yfir páskana í frí og afslöppun. Svo þegar ég fer aftur út er planið að halda áfram að farða í stúdíóunum þar sem ég er að vinna mikið núna og halda áfram að bæta portfólíóið mitt. Svo koma vonandi fleiri spennandi tækifæri með vorinu."