Hera Björk í úrslitum

Söngkonan Hera Björk sem er stödd í Chile þar sem hún tekur þátt í söngvakeppni sem ber heitið Vina del Mar. Hera sigraði sinn riðil í gærkvöldi en hún hlaut 6,6 stig af 7 mögulegum fyrir frammistöðu sína. Það þýðir að Hera og söngkonan Kelly King frá Bandaríkjunum eru jafnar inn í úrslitin með samtals 13,1 stig hvor af 14 mögulegum.

Það verða því Ísland, Bandaríkin og Panama sem berjast um sigurinn í úrslitum keppninnar í kvöld.

Þegar úrslitin voru tilkynnti átti eftir að kalla upp eitt land sem komst áfram en þá hafði Hera Björk ekki verið lesin upp þegar hávær öskur hljómuðu í salnum: "Islandia, Islandia, Islandia".

"Því er ekki að neita að það kom gæsahúð á stelpuna við að heyra Islandia kallað í sífellu og vera svo lesin upp. Þetta er búið að vera frábært en nú er bara málið að fara beint í háttinn því það er hljóðprufa klukkan tólf á morgun og alvara lífsins heldur áfram," sagði Hera Björk þegar hún var á leiðinni heim á hótel eftir keppnina.

"Svo er bara að koma með mávinn heim. Mávum hefur alltaf liðið vel á Íslandi," bætti hún við en verðlaunagripur keppninnar er Mávur.