Winehouse og Madness á „stjörnugötu“

Söngkonan Amy Winehouse og hljómsveitirnar The Who og Madness eru meðal þeirra nafna sem líklegt er að heiðruð verði á nýrri „stjörnugötu“, eða „walk of fame“ í Camden-hverfinu í London. Stefnt er að því að hefja framkvæmdir í sumar.

Yfirvöld í Camden-hverfinu, sem er í Norður-London, stefna að því að líkja eftir götunni frægu í Hollywood með því að leggja þrjátíu gullplötur í jörðu með nöfnum heimsþekktra hljómsveita og tónlistarfólks. Fleiri diskar verða svo afhjúpaðir í haust, um leið og stytta af Amy Winehouse verður reist á sama stað.

Önnur nöfn sem spurst hafa út eru meðal annarra rapparinn Grandmaster Flash, Gil Scott-Heron heitinn, R&B-hljómsveitin Soul II Soul, Frank Sinatra og The Doors.

Tónleikahaldarinn Lee Bennett, sem er viðriðinn verkefnið, segir í viðtali við BBC að hann telji Camden vera „hina einu sönnu höfuðborg rokksins“.