Fylgdust með fólki stunda BDSM-kynlíf

Sjónvarpsþættirnir Tveir plús sex byrja á Popptíví á morgun. Þættirnir fjalla á opinskáan hátt um kynlíf og eru í umsjá Sunnevu Sverrisdóttur og Veigars Ölnis Gunnarssonar.

Tökum á þáttunum lauk fyrir áramót og að sögn þáttastjórnendanna gengu þær vonum framar. Þættirnir eru hugsaðir sem skemmtilegir fræðsluþættir fyrir ungt fólk.

"Maður lærði heilan helling, bæði um hluti sem ég taldi mig vita allt um, eins og kynfærin, og svo um hluti sem ég vissi ekkert um, eins og BDSM. Við fengum meðal annars að fylgjast með fólki iðka BDSM og það var mjög fróðlegt og vissulega dálítið óþægilegt. Eftir að hafa fræðst um þetta komst ég að því að BDSM snýst fyrst og fremst um virðingu og samþykki," segir Sunneva. Veigar tekur í sama streng: "BDSM-heimurinn kom mér klárlega mest á óvart. Á yfirborðinu virðist þetta vera ofbeldi en við komumst að því að í raun getur BDSM ekki verið lengra frá ofbeldi."

Tvímenningarnir lögðu ýmislegt á sig til að kanna alla kima kynlífs. Þau prófuðu meðal annars kynlífsrólu og Veigar fór í brasilískt vax, nokkuð sem hann mun ekki gera aftur."Við Veigar erum orðin svo blygðunarlaus í umræðunni um kynlíf eftir þetta, en það er einmitt markmið þáttanna; að opna umræðu og huga fólks um kynlíf og stuðla að fræðslu," segir Sunneva að lokum.