Sögðu að ég væri galin að reyna þetta

"Fer ekki langt í bili...sneri við á Reykjanesbrautinni," voru skilaboð Ragnheiðar Elínar Árnadóttur þingmanns Sjálfstæðisflokksins í Suðurkjördæmi á Facebooksíðunni hennar með myndinni sem hún tók í bílnum sínum í morgun.

Lífið heyrði stuttlega í Ragnheiði sem hafði þó komið börnunum í skólann í morgun en var ásamt eiginmanni sínum komin undir teppi með kveikt á kertalósum með vinnutölvuna í fanginu.

"Ég fór ekki langt. Á bensínstöðinni N1 hér í Reykjanesbæ sögðu þeir að ég væri galin að reyna þetta því það er fljúgandi hálka. Svo heyrði ég að það væru bílar að þvælast þarna fyrir þannig að ég sneri við þegar ég var rétt komin af stað undir kjörorðinu: Sá vægir sem vitið hefur meira," segir Ragnheiður.

"Lögreglan á Suðurnesjunum var að brýna fyrir fólki að halda sig heima nema brýn nauðsyn væri og fór eftir því," segir hún áður en kvatt er.

Sendið okkur myndir af veðurofsanum á ritstjorn@visir.is.