Ný stjórn tekin við í Noregi

Ný stjórn Hægri flokksins og Framfaraflokksins er tekin við í Noregi. Leiðtogar flokkanna, þær Erna Solberg og Siv Jensen, kynntu ráðherra stjórnarinnar í morgun.

„Allir þessir ráðherrar hafa lofað að gera sitt besta fyrir Noreg næstu fjögur árin, og það munum við gera,” sagði Solberg eftir að hún hafði lesið upp nöfnin á ráðherrunum, sem eru átján talsins.

Solberg, sem er leiðtogi Hægri flokksins, verður forsætisráðherra og Jensen, sem er leiðtogi Framfaraflokksins, verður fjármálaráðherra. Utanríkisráðherra er Børge Brende, en kynjahlutföll nýju stjórnarinnar eru jöfn: níu konur og níu karlar eru ráðherrar.

Fyrr í morgun hafði Jens Stoltenberg beðist lausnar fyrir fráfarandi stjórn sína.