Lars: Getum vonandi ritað nýjan kafla í sögu Íslands

"Ferðin var góð og gott að geta flogið bara beint," sagði sænski landsliðsþjálfarinn, Lars Lagerbäck, á hóteli íslenska landsliðsins við komuna til Zagreb í gær.

Honum var heitt í hamsi eftir fyrri leikinn gegn Króatíu og ljóst að honum fannst brotið á hans liði. Hann var orðinn rólegri í gær.

"Tilfinningarnar báru mig eiginlega ofurliði. Mér finnst enn að dómarinn hafi ekki verið góður. Auðvitað er maður heitari meðan á leik stendur.

"Auðvitað vildum við hafa Kolbein með okkur en aðrir verða að stíga upp núna og ég hef fulla trú á þeim sem fyrir eru," sagði Lars en hvað með möguleikana eftir fyrri leikinn?

"Það kom okkur ekkert á óvart í leik þeirra. Þeir verða líklega ákveðnari núna á heimavelli. Við verðum að skila okkar og ég tel okkur eiga möguleika á því að særa þá."

Að spila einum færri í 40 mínútur tók sinn toll á leikmönnum. Hefur þjálfarinn áhyggjur af því fyrir seinni leikinn?

"Ég hef ekki áhyggjur. Það hafa allir í teyminu staðið sig vel og þeir hafa náð að jafna sig. Allir eru í fínu formi og engar áhyggjur að menn verði ekki í standi.

"Vonandi getum við skrifið nýja Íslendingasögu hér í Zagreb. Það er von okkar hið minnsta."

Viðtalið má sjá í heild sinni að ofan.