Kallaði lögregluþjón feitabollu

Rapparinn MC Hammer var handtekinn eftir rifrildi við lögreglumann í Kaliforníufylki síðasta fimmtudag.

Hinn fimmtugi Hammer var stöðvaður á bifreið sinni fyrir að vera með útrunnið skráningarskírteini á bíl sem hann átti ekki sjálfur. Þegar lögreglumaðurinn spurði hver eigandi bílsins væri fór rapparinn að þrátta og neitaði að svara spurningum lögreglumannsins. Hann var því handtekinn og færður á lögreglustöð til skýrslutöku.

Hammer var látinn laus gegn tryggingu en hann fer fyrir dómara í næsta mánuði vegna málsins, hyggist lögreglan halda málinu til streitu.

Rapparinn lét gamminn geysa á Twitter tveimur dögum eftir handtökuna, gerði stólpagrín að holdarfari lögreglumannsins, líkti honum við feitan Elvis, og sakaði hann um rasisma.