Selur uppáhalds sjónvarpsjakkann sinn

Elín Hirst fyrrverandi sjónvarpskona ætlar að feta í fótspor margra stallsystra sinna og selja fötin sín í Kolaportinu á laugardaginn. ,,Já þegar ég sá að þær Ragnhildur Steinunn og Sigrún Ósk voru að gera góða hluti með þetta ákvað ég að fara að dæmi þeirra og rýma til í skápunum hjá mér. Þar er sko eitt og annað skal ég segja þér kápur, jakkar, buxur, skór, stígvél, draktir, kjólar, klútar, hálsmen og töskur og svo framvegis."

Verðið á flestu sem Elín ætlar að selja verður frá 500 krónum upp í 3000. ,,Örfáar flíkur eru á 5000 og ein kápa sem er rosalega flott Gerard Darel kápa nánast ónotuð er á 7000, það er dýrasta flíkin, segir Elín. Pils og buxur eru á 1000-2000. Langflestir jakkarnir eru á 2000 eða 3000. Draktirnar yfirleitt á 3000. silkihálsklútar á 1500 svo dæmi sé tekið." ,,Ég á mikið að fötum frá Sand, DKNY, Tommy Hilfiger, Karen Millen, Fendy, Burberrys, Etienne Aigner, Sandra Pabst, Marco Polo, Armani, Basler, Zöru og fleirum. Mikið af þessum flíkum eru jakki og bolur eða blússa í stíl. Ég nota yfirleitt númer 42, og 39 af skóm svo flestar flíkurnar eru í þeim stærðum."

,,Ég er búin að vera undirbúa þetta alla vikuna. Velja úr hluti, þvo, strauja og verðmerkja. Eftir nær 30 ár í sjónvarpinu safnast í skápana skal ég segja þér og nú þarf ég að nota plássið í annað. Ætli vísitalan lækki ekki eftir fatasöluna mína í Kolaportinu, því verðin eru svo lág og sanngjörn, að mér finnst," segir Elín og hlær við.

,,Einn jakka vil ég nefna sérstaklega sem þykir afar vænt um og hefur verið uppáhalds sjónvarpsjakkinn minn og verður til sölu í Kolaportinu. Hann er blár með stórum hvítum kraga og hvítum tölum. Hann er kominn til ára sinna svo ég ætla að selja hann ódýrt, á 1000 kall, og vona að einhver kaupi hann sem kunni að meta þessa gæðaflík."