Bryan Singer spreytir sig á baunagrasinu

Ævintýrið um Jóa og baunagrasið þekkja flestir enda hefur sagan verið vinsæl meðal barna í áraraðir. Kvikmyndin Jack the Giant Slayer er lauslega byggð á þessu ástsæla ævintýri en þó með nokkrum herslumun.

Myndin segir frá bóndasyninum Jack sem heldur af stað á markaðinn til að selja hest sinn. Þar ber hann Isabelle, prinsessu konungsríkisins Cloister, fyrst augum og verður hugfanginn af henni. Jack kemur þó tómhentur aftur heim, ef frá eru skildar nokkrar baunir sem munkur hafði látið honum í té, og fær hann skammir þegar heim er komið og enda baunirnar á gólfinu. Stuttu síðar ber Isabelle að, en sú hafði strokið að heiman í mótmælaskyni við kóng föður sinn, og leitar skjóls hjá Jack. Skyndilega brýst risavaxið baunagras í gegnum gólfið á bænum og hrífur Isabelle með sér alla leið upp til tröllaheims í skýjunum. Prinsessunni skal bjarga og þá hefst ævintýrið fyrir alvöru.

Breski leikarinn Nicholas Hoult, sem flestir muna eftir úr gamanmyndinni About a Boy þar sem hann lék móti Hugh Grant, fer með hlutverk Jacks. Eleanor Tomlinson fer með hlutverk prinsessunnar Isabelle og Ewan McGregor leikur hægri hönd konungsins. Með önnur hlutverk fara Stanley Tucci, Ian McShane og Eddie Marsan. Þeir Bill Nighy og John Kassir leika Fallon, hinn tvíhöfða leiðtoga risanna.

Leikstjóri myndarinnar er Bryan Singer en hann sló í gegn árið 1995 með myndinni The Usual Suspects sem hefur öðlast eins konar költkenndan sess í kvikmyndasögunni. Hann hefur einnig leikstýrt ævintýramyndunum X-Men, X-Men 2, Superman Returns og X-Men: First Class. Singer og Hoult unnu einmitt saman við gerð síðastnefndu myndarinnar en þar fer Hoult með hlutverk Hanks McCoy, eða Beast. Þeir félagar munu leiða hesta sína aftur saman í myndinni X-Men: Days of Future Past sem frumsýnd verður á næsta ári.

Myndin verður frumsýnd annað kvöld og sitt sýnist hverjum um gæði hennar. Á vefsíðunni Rottentomatoes.com fær hún 52 prósent í einkunn, vefsíðan Imdb.com gefur henni 6,6 stig og á Metacritic.com hlýtur hún aðeins 5,1 í einkunn.