Ryan Gosling leggur leiklistina á hilluna

Hjartaknúsarinn Ryan Gosling ætlar sér að leggja leiklistina til hliðar á næstunni. Þetta lét hann eftir sér í viðtali við Huffington Post í gær. Gosling, sem er 32. ára, byrjaði leikferil sinn aðeins átta ára gamall í Disney þáttaröðinni Mickey Mouse Club, þar sem hann lék við hlið Britney Spears, Justin Timberlake og Christinu Aguilera. Hann sló svo rækilega í gegn í the Notebook árið 2004.

Gosling segir pressuna sem fylgir því að leika aðalhlutverk í stórmynd ekki vera hans tebolla.

„Mér finnst ég hafa misst sjónar á því sem ég er að gera. Ég held að það sé gott fyrir mig að taka mér frí og vinna úr þessu. Ég þarf pásu frá leiklistinni og ég hugsa að aðdáendur mínir þurfi það líka."

Gosling hefur þó ekki alveg sagt skilið við kvikmyndaheiminn, en hann hefur mikinn áhuga á að eltast við draum sinn um að verða leikstjóri.