Gleðin verður í bænum um páskana

Þeir sem verða í bænum um páskana verða ekki sviknir. Í fyrsta sinn verður Páskagleði haldin í Listasafni Reykjavíkur á laugardeginum, 30. mars. Á tónleikunum koma fram listamenn sem allir eiga það sameiginlegt að spila tónlist sem einkennist af gleði og það á heldur betur við um páskana. Ásgeir Trausti fer þar fremstur í flokki en hann kemur fram ásamt hljómsveit sinni. Ásgeir kemur ferskur heim frá Bandaríkjunum þar sem hann er á tónleikaferð þessa dagana. Spilar í Boston, Texas, Toronto, San Francisco, New York og víðar. Í viðtalinu sem hægt er að horfa á í spilaranum hér fyrir ofan segir hann aðeins frá því sem er á döfinni næstu mánuði. Hann er búinn að semja við útgáfufyrirtækið One Little Indian og ætlar meðal annars að gefa plötuna sína, Dýrð í dauðaþögn, út með enskum texta út um allan heim. Platan seldist í 24 þúsundum eintaka hérlendis og vann til ferna verðlauna á Íslensku tónlistarverðlaununum árið 2012. Sísý Ey kemur einnig fram á Páskagleðinni en þessi upprennandi hljómsveit hefur heldur betur komið á óvart undanfarna mánuði. Lagið þeirra Ain't Got Nobody hefur verið að gera góða hluti á X-977 undanfarnar vikur. Þá komu þau skemmtilega á óvart á Sónar hátíðinni og fengu einróma lof gagnrýnenda. DJ Margeir, einn þekktasti og hæfileikaríkasti plötusnúður landsins, kemur einnig fram líkt og söngvarinn Daníel Ágúst. Þórunn Antonía kemur fram ásamt Berndsen og ætla þau að spila sína skemmtilegu danstónlist sem kemur öllum út á gólfið. Hér fyrir neðan má sjá viðtal við Þórunni um tónleikana.

Hægt er að fylgjast nánar með undirbúningi tónleikanna og vinna miða á Facebook-síðu Páskagleðinnar. Hér á midi.is er hægt að kaupa miða. Þeir kosta 4.900 krónur og er 20 ára aldurstakmark. Á Twitter og Instagram eru gestir hátíðarinnar síðan hvattir til að merkja færslur sínar með #paskagledi.