Keira Knightley leikur Coco Chanel

Tískukóngurinn Karl Lagerfeld hyggst framleiða og leikstýra stuttmynd um Coco Chanel í tilefni af þeim hundrað árum sem liðin eru síðan hún opnaði sína fyrstu búð í París. Mun það falla í skaut bresku leikkonunnar Keiru Knightley að leika hina goðsagnakenndu Gabrielle „Coco" Chanel.

Knightley hefur um tíma verið í miklu uppáhaldi hjá Lagerfeld, en hún er andlit Coco Mademoiselle ilmvatnsins sem tískuhúsið framleiðir. Stuttmyndin mun líta dagsins ljós í Singapúr í maí, þegar Lagerfeld frumsýnir Cruise línu tískuhússins.

Hér til hliðar er hægt að sjá auglýsingu sem Keira lék í fyrir Chanel á dögunum þar semhún kynnti ilmvatnið Coco Mademoiselle.