Friðrik stefnir Ólafi fyrir dóm

Friðrik J. Arngrímsson, framkvæmdastjóri Landssambands íslenskra útvegsmanna (LÍÚ), hefur stefnt hagfræðingnum Ólafi Arnarsyni fyrir meiðyrði.

Friðrik telur að sér vegið í tveimur pistlum sem Ólafur birti á vefmiðlinum Pressunni, fyrst í júlí 2010 og svo í júlí 2011. Þar hélt Ólafur því fram að LÍÚ, fyrir tilstilli og undir stjórn Friðriks, styddi vefinn AMX til nafnlausra níðskrifa með dulbúnum fjárframlögum sem næmu tuttugu milljónum á ári.

Friðrik krefur Ólaf um eina milljón króna í miskabætur og auk þess um 1,6 milljónir til að standa straum af kostnaði við að birta dóminn í fjölmiðlum. Málið verður tekið fyrir 10. apríl. - sh