Vaðlaheiðargöng: Umtalsverð áhætta fyrir ríkissjóð

Fyrirhuguð lánveiting ríkisins vegna Vaðlaheiðarganga ber í sér umtalsverða áhættu fyrir ríkissjóð og kallar á endurmat á fjármögnun framkvæmdanna. Þetta kemur fram í skýrslu sem IFS Greining vann fyrir fjármálaráðuneytið.

Skýrslan, sem var kynnt á ríkisstjórnarfundi í morgun, er þó ekki eins svört og sú sem Pálmi Kristinsson verkfræðingur kynnti í síðustu viku.

Að mati IFS Greiningar eru helstu forsendur varðandi stofnkostnað og rekstur Vaðlaheiðarganga innan raunhæfra marka. Á móti er bent á að óvissa ríkir um endufjármögnunarkjör Vaðlaheiðarganga hf, félagsins sem mun annast gerð ganganna.

Ríkið mun fjármagna verkefnið með láni til félagsins en gert er ráð fyrir því að það lán verði endurgreitt eftir þrjú ár. Ómögulegt er að segja hvaða vaxtakjör verða þá í boði og að mati IFS Greiningar felur þetta í sér umtalsverða áhættu fyrir ríkissjóð.

Skýrsluhöfundar telja nauðsynlegt að eigið fé Vaðlaheiðarganga hf verði aukið úr fjögur hundruð í átta hundruð milljónir króna til að dæmið gangi upp.

Fjárlaganefnd Alþingis mun funda um málið í næstu viku.

„Ef að allar líkur eru á því að verkefnið standi undir sér þá sé mjög mikilvægt að fara í þetta verk. Bæði útaf því að það skapar vinnu og auk þess er það mikilvægt fyrir samfélagið fyrir norðan, fyrir atvinnusvæðið og iðnaðarframkvæmdir á Bakka, þó að það sé ekki tekið inn í þessa greiningu," segir Oddný Harðardóttir, fjármálaráðherra.