Efling: Klárt brot á finnsku stelpunni eins og hún lýsir því

„Eins og þessu er lýst þá er þetta klárt brot," segir Harpa Ólafsdóttir, forstöðumaður kjaramálasviðs Eflingar um málefni finnsku stúlkunnar Maiju. Hún réði sig á bóndabæ í gegnum Nordjobb sem herbergisþerna í ferðaþjónustuhluta bæjarins en félagsmenn Eflingar starfa meðal annars sem herbergisþernur. Samkvæmt samningi átti Maija að vinna átta tíma vaktir og eiga tvo frídaga í viku.

Í rauninni þurfti hún að vinna 12 tíma vaktir án þess að fá borgaða yfirvinnu og bóndinn tjáði henni að hann myndi sjálfur ákveða hvenær hún fengi að taka út frídagana.

Þetta segir Harpa ekki standast skoðun. Hún segir það til að mynda ekki boðlegt að yfirmaður ákveði eftir eigin geðþótta hvenær starfsmaður taki sér frí.

Harpa segir að mikið af erlendum ungmennum leiti til stéttarfélagsins á sumrin vegna viðskipta þeirra við vinnuveitendur sem reyni að hagnýta sér vinnuafl þeirra með ólögmætum hætti. Hún segir vandamálin af öllum toga og í raun leiti íslensk ungmenni líka mikið til þeirra á sumrin af sömu ástæðum.

Hún segir Eflingu hafa áhyggjur af þessu, þá ekki síst vegna viðkvæmra stöðu útlendra ungmenna sem kunna ekki tungumálið og hafa ekkert félagslegt net í kringum sig hér á landi.

Verkefnastjóri Nordjobb á Íslandi, Stefán Vilbergsson, sagði í samtali við Vísi í morgun að málið horfði ekki við honum sem „sá skandall sem það virðist vera í þessari frétt" eins og hann orðaði það sjálfur.

Þannig sagði Stefán að samkvæmt sínum upplýsingum hefði vinnuveitandinn ekki verið nógu skýr um það hvernig ástandið var á þessum tíma á sveitabænum, í byrjun sumars. Hann hafi ekki komið nógu hreint fram um það.

„Það er skiljanlegt að það kraumi óánægja þegar svo verður. En við sjáum ekki annað en að það hafi verið tímabundið," sagði Stefán og bætti við að starfsemin hefði bara verið nýhafin, og þá finnist sér skiljanlegt að það séu aðeins lengri vaktir.

„Með betri samskiptum hefði þetta ekki verið neitt mál," ítrekaði Stefán svo.

Maija hafnaði þessum skýringum alfarið þegar haft var samband við hana á ný. Þannig sagði hún að það hefði síður en svo verið fullbókað í ferðaþjónustunni þegar hún hóf vinnu þar í vor. „Samt var ég látin vinna tólf tíma en ekki átta tíma eins og ráðningarsamningur minn kvað á um," sagði Maija.

„Ég sá því fram á svipað vinnulag þegar yrði fullbókað á bænum og því ákvað ég að hætta strax."

Maija segir að það hafi einnig ráðið miklu um að hún hætti að önnur erlend starfsstúlka á staðnum hafði svipaða sögu að segja af samskiptum sínum við bóndann, það er að vinna yfirvinnu án þess að fá borgað fyrir það.