Maija segir engan misskilning í samskiptunum við bóndann

Finnska stúlkan Maija segir að enginn misskilningur hafi verið í gangi í samskiptum sínum við bóndann sem hún hætti að starfa fyrir eftir vikudvöl sem herbergisþerna í ferðaþjónustu hans. Þar að auki hafi allt traust hennar til bóndans verið horfið þegar hún fór af staðnum.

Maija segir í samtali við Fréttastofu að það hafi síður en svo verið fullbókað í ferðaþjónustunni þegar hún hóf vinnu þar í vor. „Samt var ég látin vinna tólf tíma en ekki átta tíma eins og ráðningarsamningur minn kvað á um," segir Maija. „Ég sá því fram á svipað vinnulag þegar yrði fullbókað á bænum og því ákvað ég að hætta strax."

Maija segir að það hafi einnig ráðið miklu um að hún hætti að önnur erlend starfsstúlka á staðnum hafði svipaða sögu að segja af samskiptum sínum við bóndann, það er að vinna yfirvinnu án þess að fá borgað fyrir það.