Lögreglan vill lífsýni úr skyldmenni Rögnu Estherar

Rannsóknarlögreglumaður, sem starfar hjá rannsóknarlögreglunni í Portland Oregon í Bandaríkjunum, segir að þeir þurfi lífsýni úr skyldmenni Rögnu Estherar Sigurðardóttur. Þetta kemur fram í viðtali blaðsins Oregonlive við rannsóknarlögregluna Carol Thompson sem tilheyrir rannsóknardeild sem sérhæfir sig í óleystum morðmálum.

Ekkert hefur spurst til Rögnu Estherar síðan árið 1952. Í raun er talið að hún hafi horfið árið 1951. Ragna Esther flutti til Bandaríkjanna árið 1946 ásamt eiginmanni sínum sem hún kynntist hér á landi. Það var hermaðurinn Larry Gavin. Hann virðist hafa beitt Rögnu miklu ofbeldi á meðan hjónabandi þeirra stóð og standa sumir í þeirri trú að hann hafi með einhverjum hætti komið að hvarfi Rögnu. Hún eignaðist tvö börn með Gavin. Sonur þeirra hjóna er nýfundinn en dóttir þeirra lést árið 1999.

Málið er hin mesta harmsaga. Oregonlive hefur fjallað ítarlega um málið en þar ytra er Ragna Esther einfaldlega kölluð Stríðsbrúðurin. Fjölskylda Rögnu á Íslandi hafa leitað hennar ákaft alveg frá því hún hvarf.

Rannsóknarlögreglumaðurinn Carol Thompsons segir að nú þurfi lífsýni úr ættingja Rögnu sem verður að skrá í gagnagrunn í Norður-Texas. Vonast er svo til að það verði í kjölfarið hægt að bera lífsýni hennar við lífsýni líkamsleifa, sem hafa fundist á svipuðu svæði og hún hvarf, en kennsl hafa aldrei verið borin á.

Annar rannsóknarlögreglumaður, Dennis Baker, tók upp á því að kanna afdrif Rögnu Estherar, samkvæmt Oregonlive. Hann hefur ekkert fundið og segir í viðtali við blaðið að hann telji tímann helstu hindrun rannsóknarinnar, enda um 50 ár liðin frá hvarfi Rögnu.