Jólin búin hjá alþingismönnum

Alþingi kemur saman á ný í dag, eftir mánaðarlangt jólafrí. Þingnefndir hófu fundi í morgun og voru Vaðlaheiðargöng á dagskrá tveggja þeirra, bæði fjárlaganefndar og umhverfis- og samgöngunefndar.

Þingfundur hefst svo klukkan þrjú með því að minnst verður Sigurðar Bjarnasonar frá Vigur, sem lést fyrir tíu dögum, en hann er síðastur þeirra þingmanna til að kveðja sem stofnuðu íslenska lýðveldið á Þingvöllum árið 1944.

Jóhanna Sigurðardóttir forsætisráðherra mun að því loknu flytja þinginu skýrslu um störf og stefnu ríkisstjórnarinnar, en síðan taka við fyrirspurnir til ráðherra. Sú fyrsta er til innanríkisráðherra um gerð og fjármögnun Vaðlaheiðarganga.