Ólafur Harðarson í framkvæmdastjórn Evrópusamtaka stjórnmálafræðinga

Ólafur Þ. Harðarson, forseti Félagsvísindasviðs, hefur verið kjörinn í framkvæmdastjórn (executive committe) Evrópusamtaka stjórnmálafræðinga, European Consortium for Political Research (ECPR) til næstu sex ára. Ólafur varð þriðji í röð 14 frambjóðenda, en að þessu sinni voru átta kosnir í framkvæmdastjórnina.

ECPR eru helstu samtök evrópskra stjórnmálafræðinga, eftir því sem fram kemur í tilkynningu frá Háskóla Íslands. Þau standa fyrir umfangsmiklu rannsóknarsamstarfi, ráðstefnuhaldi, útgáfu og aðferðafræðikennslu. Um 400 háskólastofnanir í yfir 50 löndum eru aðilar að samtökunum, einkum í Evrópu, en einnig utan þeirra. Hver stofnun fór með eitt atkvæði í rafrænni kosningu.