Sala Gagnaveitunnar ill nauðsyn

„Það kæmi mér ekki á óvart ef það yrði mikill áhugi frá fjárfestum á Gagnaveitu Reykjavíkur." Þetta segir Dagur B. Eggertsson, formaður borgarráðs. Borgarstjórn Reykjavíkur hefur nú gefið Orkuveitu Reykjavíkur umboð til að hefja undirbúning á sölu á 49 prósent hlut í Gagnaveitunni.

Í samtali við Vísi sagði Dagur að sala Gagnaveitunnar sé ill nauðsyn. Erfiðleikar Orkuveitunnar kalli á eignasölu og samhliða Gagnaveitunni séu aðrar eignir OR í söluferli - þar á meðal Orkuveituhúsið og Perlan.

„Gagnaveitan er ein af þeim eignum sem nefnd var í upphafi," segir Dagur. „Meðal annars vegna þess að þetta er gott fyrirtæki sem skilar miklum eignum."

Hann bendir á að miklar afborganir blasi við á næsta ári, því hafi borgarstjórn og stjórn OR nálgast málið af raunsæi og ábyrgð. „Aðalmálið er að björgunaraðgerðirnar gangi eftir," bætir Dagur við. „Og það ætlum við að tryggja."

Gagnaveita Reykjavíkur var stofnuð sem einkahlutafélag árið 2007 og hefur síðan þá verið að fullu í eigu Orkuveitunnar. Gagnaveitan rekur gagnaflutningskerfi, meðal annars ljósleiðaratengingar.

„Það eru eflaust margir þolinmóðir fjárfestar sem vilja eiga í fyrirtæki líkt og Gagnaveitan er."

En er það ábyrgt af hálfu borgarstjórnar að selja stóran hlut í svo þýðingarmiklu innviðafyrirtæki?

„Við reynum að mæta báðum heimum í þessu," segir Dagur. „Annars vegar reynum við að losa um fé. Hins vegar viljum við tryggja það að hraður gagnaflutningur standi fyrirtækjum og heimilum til boða með því selja hluta af fyrirtækinu."