Hörðustu árásir Ísraela á Gasaströndina í fjögur ár

Yfirmaður herafla Hamas-samtakanna var fyrsta skotmark ísraelska hersins í nýrri hrinu árása gegn herskáum Palestínumönnum á Gasa. Hamas segja Ísraela hafa „opnað gáttir eigin vítis“ með árásunum.

Ahmed Jabari, æðsti yfirmaður herafla Hamas-samtakanna, lét lífið þegar gerð var loftárás á Gasaborg síðdegis í gær. Sonur hans lét einnig lífið í árásinni.

Fleiri árásir á að minnsta kosti tuttugu staði í Gasaborg og víðar á Gasaströnd fylgdu í kjölfarið. Ísraelar segja þetta upphafið að frekari hernaði gegn herskáum hópum Palestínumanna á Gasa, einkum þó Hamas-samtökunum.

Allt benti til þess að langvarandi átök við Palestínumenn væru í uppsiglingu og Ísraelsher segist ekki útiloka landhernað í beinu framhaldi. Fjöldi manna safnaðist saman í Gasaborg í gær stuttu eftir árásina á Jabari og hvatti til hefndarárása gegn Ísrael.

„Hernámsveldið hefur opnað gáttir eigin vítis,“ segir í yfirlýsingu frá Essedine el Kassam-herdeildunum, herafla Hamas-samtakanna, sem Jabari var í forystu fyrir. Aðrir hópar herskárra Palestínumanna hóta hefndum og segja engar hömlur verða á viðbrögðunum.

Ísraelsk stjórnvöld hafa beðið alla íbúa í fjörutíu kílómetra radíus í kringum Gasa-svæðið að halda sig innandyra í dag af ótta við hefndaraðgerðir.

Vitni segja að Jabari hafi verið á ferð í bifreið sinni í Gasaborg þegar sprengja féll á bifreiðina. Hann hefur lengi verið efstur á lista þeirra Palestínumanna sem Ísraelar vilja losna við.

Utanríkisráðherrar Arababandalagsins munu koma saman til fundar vegna árásanna í Kaíró á laugardag. Þá hafa Egyptar kallað sendiherra sinn heim frá Ísrael.

Ísraelski herinn réttlætir árásirnar með því að herskáir Palestínumenn á Gasaströnd hafi undanfarið skotið hundruðum sprengjuflauga yfir landamærin til Ísraels. Íbúar nálægt landamærunum hafi búið við þessa ógn árum saman. Að sögn ísraelska hersins var árásunum einkum ætlað að eyðileggja skotflaugabúnað Palestínumanna.

„Jabari bar ábyrgð á því að fjármagna og stýra hernaðaraðgerðum og árásum gegn Ísrael,“ segir í tilkynningu frá ísraelsku öryggisstofnuninni Shin Bet. „Með því að ryðja honum úr vegi í dag eru send skilaboð til yfirmanna Hamas á Gasa um að ef þeir halda áfram að styðja hryðjuverk gegn Ísrael, þá mun það bitna á þeim sjálfum.“

Hamas-samtökin hafa farið með stjórn á Gasaströnd undanfarin ár, en Ísraelar hafa á meðan haldið Gasa í herkví með þeim afleiðingum að atvinnulíf þar er allt lamað og lífskjör í lágmarki.

gudsteinn@frettabladid.is

stigur@frettabladid.is