Vesti sem faðmar þig

Nemendur MIT-háskólans hafa hannað sérstakt vesti sem lætur þann sem því klæðist vita þegar vinur viðkomandi á Facebook líkar við stöðuuppfærslu á samskiptasíðunni. Vestið, sem er kallað „Like-A-Hug“, blæs út líkt og björgunarvesti þegar „lækað” er og er tilfinningin sögð í líkingu við faðmlag..

Melissa Kit Chow, aðalhönnuður samskiptaflíkurinnar, segir vestið tilraun til að lágmarka sársauka sem fylgir fjarbúð og skora á hólm takmarkanir myndbandssamtala á vefnum, eins og Skype. Sá sem klæðist vestinu getur svo endurgoldið greiðann með því að kreista flíkina, sem tæmir úr henni loftið og sendir um leið faðmlag til baka. Enn er vestið einungis hugsað sem verkefni og verður ekki sett í almenna sölu.