Lögguhasar og læti í L.A.

Hasarmyndin End of Watch verður frumsýnd um helgina. Myndin hefur hlotið gríðarlega góða dóma og lofar miklum hasar og látum.

Jake Gyllenhaal og Michael Peña fara með aðalhlutverkið í myndinni. Þeir leika bestu vini og félaga í lögreglunni í Los Angeles, þá Brian Taylor og Mike Zavala.

Taylor og Zavala starfa á einu hættulegasta og harðasta svæði í Los Angeles og þurfa þar að eiga við harðsvíraða glæpamenn á hverjum degi. Taylor, leikinn af Gyllenhaal, er á kvikmyndanámskeiði samhliða vinnunni og nýtir þá atburði og þau viðfangsefni sem hann þarf að takast á við sem efni í mynd sem hann er að vinna að á námskeiðinu. Þeir félagar eru því með upptökuvél falda á sér, auk þess sem slíka er að finna í bifreið þeirra og taka þær upp þeirra daglega líf. Stór hluti af kvikmyndatökunni í End of Watch er þannig að svo virðist sem þessar áföstu myndavélar séu notaðar til verksins og fá áhorfendur nánara innlit inn í daglegt líf þeirra félaga, bæði úti á götunni og heima í faðmi fjölskyldunnar.

Í starfi sínu á hverjum degi lenda þeir Taylor og Zavala í ótrúlegustu hlutum. Jafnvel það sem í fyrstu lítur út fyrir að vera hið minnsta mál verður oft mun stórvægilegra þegar á hólminn er komið. Þegar þeir óvart ramba inn í aðstæður sem gera þá að helsta skotmarki helstu gengja svæðisins er þó voðinn vís.

Myndin hefur vakið mikla athygli og fengið gríðarlega góða dóma. Sem dæmi má nefna að hin mikils virta síða Rotten Tomatoes, sem er ekki þekkt fyrir að skafa utan af hlutunum, gaf henni 85% í einkunn og 91% þeirra sem kusu þar á síðunni sögðu myndina góða. Þeir Gyllenhaal og Peña þykja ná einstaklega vel saman og myndin sýna hinn kalda raunveruleika undirheima vel.